Blúsbíltúr

Hrafnkell tók þátt í blúsrúnti og bílasýningu með Bláu Lenu.  Við strákarnir kíktum í heimsókn og fengum að vera með í lokarúntinum.

From 03 mars

From 03 mars

From 03 mars

From 03 mars

From 03 mars

Ísbíltúr á Gulu hættunni

Gula hættan var dregin fram undan ábreiðunni á sunnudaginn og að sjálfsögðu var farið í ísbíltúr! Strákunum þótti þetta mikið ævintýri og sjálfsögðu þurftu þeir líka að prófa að "keyra".

Upprennandi ökuníðingur

Tobbi er orðinn algjör ökuþór eins og þessar myndir bera með sér.

Í gær eyddum við hluta úr degi í Fjölskyldu- og húsdýragarðinum og Tobbi fékkst varla úr litlu bílunum, keyrði hring eftir hring eftir hring.... Æfðist reyndar nokkuð, því í lokin var hann hættur að keyra jafn mikið á og þegar hann byrjaði.
Og svo tók hann mega frekjukast þegar hann fékk ekki að fara í ökuskólann og prófa stóru bílana eins og stóri bróðir.

Í dag fórum við í ferð í sveitina með leikskólanum. Tobbi hafði engan áhuga að skoða dýrin heldur nýtti hann megnið af tímanum til að prófa ALLA traktorana. Það var með semingi að aðrir fengu að prófa, og á meðan stóð sá stutti við traktorinn og tók það fram aftur og aftur að hann ÆTTI traktorinn og fengi að fara næst!

Þegar ég spurði hann hvort lömbin vildu nokkuð prófa traktorinn svaraði minn maður: "Nei, þau eru ekki með neinar hendur!"

Veitingahús, markaður og heimsókn til Viggós, Gorms og Svals og Vals

Þrátt fyrir hátt þreytustig um helgina og kalt veður vorum við samt mjög öflug og gerðum heilmikið.

Á föstudagskvöldið kom barnapían hún Cynthia og passaði guttana á meðan við hjónin fórum út að borða með Óla og Laurence á L'Auberg'in. Þetta er snilldar veitingastaður sem er sirka 5 mín frá okkur. Lítill, kósí, í algjörum sveitastíl, rómantískir litir, þykk gluggatjöld og síðir dúkar. Þar er alltaf eldur á hlóðum og steikurnar grillaðar á eldinum. Og matur er sko ekki af verri endanum. Endar er staðurinn vinsæll og maður þarf að bóka með sirka 2ja vikna fyrirvara. Við pöntuðum öll 4 rétta menu og fengum sko mikið fyrir peninginn. Alveg yndislegt kvöld! Á meðan hafði Cynthia það náðugt heima því báðir strákarnir steinsofnuðu bara rétt eftir að hún kom svo hún gat bara glápt á imbann....

Á laugardaginn skriðum við í seinna fallinu úr koju, en bara drifum okkur í föt og fórum á markaðinn eins og sagt var frá hér neðar. Tókum lestina sem Kjartani þykir alltaf jafn mikið ævintýri, byrjuðum svo á að fá okkur morgunkaffi og súkkulaðibrauð á Le Pain Quotidienne. Mikilvægur liður í markaðsferðum.

Síðdegið leið svo bara í leti og leikjum við strákana. Elduðum svo skötuselinn hans Óla og höfðum það náðugt.

Á sunnudeginum fékk pabbinn að sofa út á meðan við strákarnir fórum niður, fengum okkur morgunmat og horfðum á Grísla. Lékum okkur aðeins með myndavélina og höfðum það gott. Um hádegið fóru svo Hrafnkell og Kjartan í leikfimina á meðan við Tobbi hvíldum okkur.

Seinnipartinn skelltum við svo okkur í Autoworld og skoðuðum sýningu til heiðurs Franquin, pabba Viggó viðurtans, Gorms og Svals og Vals. Sýningin var algjör snilld og þar mátti skoða útfærslur af hinum ýmsu hlutum úr þessum teiknimyndabókum, Gaffófóninn hans Viggós ásamt ýmsum uppfinningum hans, Gormahreiðrið og Gorm sjálfan, Túrbóbílana þeirra Svals og Vals, flugbílinn hans Zorglúbbs og fleira og fleira. Við skemmtum okkur konunglega að skoða þetta og hina ýmsu muni sem voru til sýnis, fyrstu teikningarnar af ýmsum bröndurunum og fleira tengt þessum fígúrum.

Eftir Franquin sýninguna röltum við síðan um bílasafnið og skoðuðum gamla og góða bíla, bæði flotta og ljóta.
Kjartani fannst nú mest gaman að skoða útstillingar þar sem verið var að útskýra hvernig ýmislegt í bílum virkar og þar var allt sem snérist mest spennandi!!! En honum til ánægju fundum við líka bæði Luigi og Þjálfa (úr Bílunum) og pabbinn gat skoðað nokkra "litla sæta" bíla.